مش قادر اخفى شماتتى فى انفصال بريطانيا عن الاتحاد الاروبى , بريطانيا اللى كانت سبب رئيسى فى كتير من مأسى وهموم شعوب عربيه,
بريطانيا اللى تاريخها معانا هو سلسلة من مراحل استعمار ومؤامرات لا تنتهى ,
بريطانيا اللى بتأوى كتير من اللصوص والارهابيين اللى هاربين من دولهم .
الدور البريطانى فى السنه الاخيره فى كتير من الاحداث فى مصر كان واضح ومستفز , بريطانيا وغيرها من الدول اللى شاركوا فى مخطط تدمير وتقسيم دول عربيه ضمن (الربيع العبرى) , اخيراً خرجت من الاتحاد الاروبى واللى يمكن يكون بدايه لانفصال دول اخرى وممكن يكون سبب فى انفصال اسكتلندا وايرلندا الشماليه !... هذه بضاعتكم ردت اليكم

البورصه واقتناص الفرصه

 البورصه المصريه وصلت لمستوى اسعار لايمكن حد يتصوره , اعتقد مهما كان مستوى السوء اللى فيه البورصه الاسعار دى تعتبر فرصه لا تعوض لاى حد عاوز يكون مراكز ماليه , كنت اتمنى ان صناديق الاستثمار المملوكه لبنوك وطنيه هى اللى تقوم بالدور ده وتحقق مكسب للدولة ولحملة الوثائق وترجع شىء من الاستقرار للبورصه

اجمل حاجه فى مشروع تطوير العشوائيات اللى بينفذه صندوق تحيا مصر هى ابواب الامل اللى بيفتحها قدام ناس كتير , مش بس اللى استلموا شقق واتنقلوا من مستنقع الفقر والفوضى والعشوائية لحياة ادمية مختلفه, لكن الامل بقى قدام ناس كتير ممكن تتحمل حياتها الصعبة وهم شايفين الفرصه مش مستحيلة عشان يترحموا من معاناتهم.
ولفت نظرى حاجه مهمه فى خطاب الرئيس وهو بيتكلم عن الناس دى باحترام وانهم مايختلفوش عن باقى المصريين رغم ظروف معيشتهم الصعبة ,, ودا اللى كان بيحاول يأكده بعض السينمائيين اللى ما يعرفوش ينتجوا غير السواد والقبح تحت شعار الواقعية وكان دائما رسالتهم واضحة :ان العشوائيات مافيهاش غير ارهاب واجرام ودعاره مخدرات وان مفيش اى نموذج ايجابى ممن يطلع من الوسط ده ,وكأن ذنبهم البؤس اللى نشاوا فيه.
لو مصر قدرت تتغلب على مشكلة العشوائيات اللى تراكمت خلال 50 سنة او اكتر يبقى املنا فى مستقبل واعد شىء قابل للتحقيق.
ويارب الخير دائماً لمصر

مسلسلات رمضان اتكلفت حوالى 2 مليار جنيه, مش مشكلة لو كانت دراما حقيقية بتشكل جزء من القوة الناعمه لمصر او بتقدم شىء هادف او بتشخص مشاكل مجتمعنا وتوعى بقضايا مهمه , انما اما المبلغ ده يندفع فى مجموعة اعمال اغلبها بيتكلم عن البلطجية وبنات الليل وبتروج للابتذال والسوقية وبترسخ صورة سلبية عن المجتمع المصرى فى باقى الدول العربية, كده يبقى موت وخراب ديار ومفيش مستفيد فى النهاية غير مجموعه من المنتجين وسماسرة الاعلانات اللى مالهمش اى علاقة بفن او ثقافة

عيدالعمال

 1 مايو رغم انه ذكرى تقريباً كل العالم بيحتفل بها الا انه يظل فى النهاية مناسبة امريكية وتمجيد لعمال امريكان ايا كان الدور اللى قاموا به.
كنت اتمنى اننا نحتفل بذكرى وطنيه مصريه تكون هى يوم او عيد العمال وعندنا تاريخنا الحديث ملىء بمناسبات عمالية وبادوار بطوليه قام بها عمال مصر وتضحيات منها مثلاً: ذكرى قصف مصانع ابوزعبل فى 12 فبراير 1970 واللى استشهد فيها عدد من عمال مصر وهم بيقوموا بواجبهم..
عموماً كل سنه وعمال مصر وكل حد بيتعب عشان يخلى بلده فى مكان أفضل بخير وسلام

فى ذكرى تحرير سيناء

 تحيه لكل من شارك بالحرب وبالتفاوض فى رجوع كامل التراب المصرى

موضوع ضباط الشرطة المتورطين فى قضية عصابة الجعافرة دا مؤشر خطير على الحال اللى ممكن يوصل بنا لو سكتنا على الفساد , الموضوع ما اخدش الاهتمام المناسب غير لما كان الضحيه ضابط مباحث شريف يقوم بواجبه وخيانة زمايله كانت من اسباب استشهاده.
الفساد هو اول عدو للامن وللاستقرار , ولنا نتخيل حجم السخط عند الناس من تصرفات كتير من امناء الشرطة اللى بتسىء لجهاز فيه ناس بتقدم روحها كل يوم عشان تقوم بواجبها.
لازم محاسبة كل فاسد وباشد الطرق

رفض البرلمان رفع الحصانة عن بعض النواب رسالة محبطة ,, البرىء هو اللى يطلب رفع الحصانة عن نفسه انما المدان هو اللى بيهرب من المحاكمة و يحتمى بالحصانة ,, كنت اتمنى البرلمان ياخد  نفس موقف النائب المحترم سمير غطاس ويتبنى تعديل تشريعى لالغاء الحصانة ,لكن للاسف هم اختاروا التستر على نواب "مش فوق مستوى الشبهات"  :/