رب اجعل هذا البلد امنا....

9/24/2008

موقف مصروموقف فرنسا



هذاالموقف لابد وان يدفع أى متابع للمقارنة بين سياسة الدولتين فى التعامل مع امن ومصالح مواطنيها بالرغم من معرفة ذلك مسبقا
فقيام قراصنة قرب سواحل الصومال باختطاف عدة مراكب منها مركب مصرية واختطاف اثنين من الفرنسيين جعل الفرق واضح جدا ,. فالسلطات الفرنسية ارسلت قوة قامت بتحرير الرهينتين وقتل أحد القراصنة اما السلطات المصرية فتركت المركبين وركابهما ولم نجد
سوى تصريح هزيل للخارجية

12 comments:

Geddo Iskandar said...

لول - قالك محدش يلوي دراعنا ... إحنا نسيب رجالتنا هناك وهمة مسيرهم يزهقوا ويسيبوهم


قارن بين الحوار ده و الحوار بتاع السياح اللي إتخطفوا

حكيم النيل said...

أهلا "جدو اسكندر" .أنافى رايى فيه ازمةفى تعامل الدولةمع مواطنيها ودا بيدفع كتير من الدول للاستهانةبالمواطن المصرى على اراضيها "أوحتى فى مصر" والدليل على كده اسلوب تعامل
السفارات الاجنبية مع المصريين
أماحكايةالسياحالمختطفين فدى فضيحةتانية

همس said...

ياجماعه هو دا اول موقف يحصل

عادى ما المصرين متهانين فى كل مكان

بلاش هفكرك بمصير سعاد حسنى اللى اتقتلت ولحد دلوقتى لاعارفين ازاى او مين اللى قتلها

وفى نفس الوقت سوزان تميم وشوف الامارات عملت ايه



وشوف المعامله اللى بيتعامل بيها المصرى بره
ولما يجى اى عربى ولا اجنبى بيلاقى معامله احسن من اهل البلد

احنا مش متهانين بره بلدنا بس دا احنا متهانين جواها

فليهم حص يعملو اكتر من كدا فيهم



معلشى ابقى سيب ايملك تانى فى المدونة

Geddo Iskandar said...

بص يا حكيم يا خويا، أنا مش عاوز أكون متحامل - بس إحنا يا مصريين مشاركين في الوضع اللي وصلنا له ... لازم منرميش كله على الحكومة المهكعة بتاعتنا دي

يعني حوار السياح اللي إتخطفوا ده مش خطأ الأفراد - ده خطأ النظام اللي مش عارف يأمن زوار و مواطنى البلد ضد عصابة كبيرهم مدفع رشاش وإحنا اللي نعتبر أكبر قوة فى المنطقة كلها من حيث العدد و ثانى أكبر قوة من حيث الكيف - دي غلطة لازم نسلخ فيها الحكومة

لكن تعامل السفارات الأجنبية مع المصريين ده خطأنا بالكامل - شوف الشباب وهوه بيريل عشان ياخد تأشيرة أمريكا ولا أوروبا و إنت تعرف إننا إحنا اللي جايبينه لنفسنا

جرب إنت أو أي حد تعرفه إنك تاخد تأشيرة سياحة مع مراتك عن طريق شركة سياحة (قناة شرعية) و تسافر بطيارة على شركة طيران محترمة و شوف فرق التعامل

من كتر الهجرة و الهروب إحنا اللي خليناهم يتعاملو معانا كده !!

على فكرة لي صديقة من المغرب حاولت تنزل مصر سياحة الصيف ده و معرفتش و بتقولى إنه على الرغم من ال 12 مليون تأشيرة سياحة اللي مصر طلعتهم السنة اللي فاتت تبقى تأشيرة مصر بالنسبة لهم أصعب من تأشيرة أوروبا !!

يعنى في الوارد إحنا بشوات لكن في الصادر إحنا زي ما إنت شايف ... الوارد ده مسئولية الحكومة أما الصادر ده فبتاعنا - بس إحنا إللى جايبينه لنفسنا

بالذمة شوفت بلد عندها شواطيء بطول شواطيئنا و نروح نصطاد عند الصومال ولا اليمن ...

مش بقولك إحنا اللي بنجيبه لنفسنا !!

حكيم النيل said...

اهلا يا همس
ممكن تبعتى على ايميل المدونة
وبالنسبة ل ياهو
egylancer@yahoo.com

حكيم النيل said...

بص بقى ياجدو .. دلوقتى هانبدأ نختلف
تأشيرة مصر بتطلع فى المطار يعنى مافيش صعوبة ولا حاجة لكن التشدد بيبقى مع اللى عاوزين يمدوا اقامتهم ودول اغلبهم بيكون وراهم مشاكل .
اما التاشيرات الاروبية فمش صعبة بس عن طريق شركات السياحة دا انت لو بتدرس شهادة من أمريكا زى السى بى ايه وحابيت تسافر لان الامتحان بس فى أمريكا فى الغالب طلبك هايترفض ولو لا قدر الله حد عاوز يسافر يتعالج فى لندن على ما يتوافق على التأشيرة بتاعته يكون ربنا افتكره.
وحكاية الهجرة دى موجودة فى كل دول العالم وده مش معناه انك تتعامل بعدم احترام مع ناس تانيه واخده طريق مشروع للسفر
أما حكاية الصيد فاتروبا نفسها عندهم سواحل طويلة وبيروحوا يصطادوا عند سواحل المغرب وانت راجل اسكندرانى وعارف الن طول السواحل مش مقياس على حجم الثروة السمكية وكل الدول اللى بتتعالى على مواطنينا اجنا لينا افضال عليهم حتى لو انكروا

Geddo Iskandar said...

موضوع التأشيرة ده أنا كنت فاكره كدة برضة لغاية الموقف اللي حكيتلك عليه و عرفت إنه الثلاث بدائل "الأسهل" اللى صديقتي فكرت فيهم بعد كدة ومكنش فيه اي مشكلة في تأشيراتهم هم تركيا و تونس و أسبانيا

حكاية تاشيرة التعليم دي أنا عارف إنها سهلة جدا (عدد كبير من أصدقائي سافر بالفعل) لو معاك منحة من جامعة مرموقة أو "دافع" فلوس علشان تتعلم في جامعة مرموقة - المشكلة في المؤسسات اللى بتكون ستار لتسرب الهجرة غير الشرعية ... إنت شفت كام شاب كانوا عاوزين يهاجروا أمريكا السنة اللي فاتت بس ... أنا لو من أمريكا أعمل أكتر من كدة والله ...

تأشيرات العلاج بمنتهى الأمانة معرفش أي حاجة عنها فا مش حأفتى

:)

الهجرة الخارجية زي الهجرة الداخلية بالضبط فيه أماكن جذب و أماكن طرد ... وحسب قوة الجذب و قوة الطرد و سلوك رعايا المنطقة الطاردة في المنطقة الجاذبة بيتحدد شكل العلاقة بين الطرفين

طبق ده على مصر وأوروبا و مصر و الخليج و انت تقدر تشوف من منظورى

....

موضوع الثروة السمكية ده صح بس برضه سواحل مصر و توافر الثروة السمكية فيها لا يمكن مقارنته بساحل فرنسا القصير على المتوسط و إستخدامه في السياحة أساسا مش الصيد ... برضه الصيد في المياه الدولية المتاخمة لمصر أكثر أمنا من الصيد في منطقة إشتهرت بوجود القراصنة منذ بداية التايخ وحتى الآن !!

ولا إيه؟؟؟

...

على فكرة - سعيد بالنقاش معك :))

حكيم النيل said...

وأنا سعيد بمشاركتك وبالنقاش ده

Anonymous said...

اخى الفاضل - اختى الفاضلة

كل عام وانتم بخير .... وتهنئة قلبية بقدوم عيد الفطر المبارك

وندعوكم لمشاركتنا حملتنا

********* ( من اجل منع المواقع الاباحية ) ************

فى انتظاركم لمشاركتنا هذا العمل الذى نعتقد اننا جميعا بحاجه الى

محاربته من اجل مستقبل امتنا ومن اجل النهى عن المنكر ..

كل عام وانتم بخير مرة ثانية وفى انتظار تواصلكم معنا

Anonymous said...

اخى الفاضل - اختى الفاضلة

كل عام وانتم بخير .... وتهنئة قلبية بقدوم عيد الفطر المبارك

وندعوكم لمشاركتنا حملتنا

********* ( من اجل منع المواقع الاباحية ) ************

فى انتظاركم لمشاركتنا هذا العمل الذى نعتقد اننا جميعا بحاجه الى

محاربته من اجل مستقبل امتنا ومن اجل النهى عن المنكر ..

كل عام وانتم بخير مرة ثانية وفى انتظار تواصلكم معنا

حكيم النيل said...

شكرا على اهتمامكم وحملة ناجحة باذن الله

حكيم النيل said...

بالمناسبة المخابرات المصرية حررت انهارده المركب وانتهت المشكله